Admin/ Рубрикасыз (Без рубрики)/ 0 комментариев

Богауланган hәйкәл

Канга күмеп, Явыз Иван
Калабызны басып алган,
Казан тулы чиркәү салган –
Бармак җитми санарга.

Шәhәрнең тик ак йөзендә
Бакый Кремль үзәгендә
Калды калкып үзе генә
Асылташы – манара.

Чиркәү итеп салыр өчен
Ничә кабер ташы күчте,
Ничә татар түкте көчен,
Yтерелде җәзалап!

Кол булдык без шуннан бирле,
Илебез – тоткынлык иле :
Хөкем йөртә безнең өстән
Ике башлы ябалак …

Һәйкәл булып тора Муса,
Богау аны буып кыскан,
Чәнечкеле богау кысан –
Татар илен камаган.

Котылырга юк чарасы,
Чигенергә юк чамасы.
Сөембикә манарасы
Бердәнбер терәк аңа.

Ник соң Җәлил ялгыз икән,
Нигә халкы ташлап киткән?..
Нишләп аны ятим иткән? –
Сыймый башка сораулар!..

Әллә халкың яңабашташ
Сатлыкҗан, дип ата ташлар?..
Гамьсез булса ватандашлар,
Азатлыкны кем яулар?!

… Җәлил, гуя, канатланган –
Еллар аша атлый алга.
Чиркәү чаңы чыңлый hаман,
Даң-доң итеп суга чаң.

Озакка син түзәрсеңме,
Богауларны өзәрсеңме,
Дошманнарны җиңәрсеңме,
Әгәр ялгызың булсаң?..

Җиңә алыр иде Муса,
Әгәр янда дуслар булса …
Читтә ятып калган дуслар
Бәлки берчак кайтырлар …

Ярдәм көтеп кичен-иртән
Чолганышта тора икәү :
Муса Җәлил, Сөембикә …
Кайда соң сез, батырлар ?!

Беренчеләр күтәрелде,
Ләкин чыбыкка бәрелде …
Тимерчыбыгы тәреле –
Тәре саны бихисап.

Өзелер ул тимерчыбык,
Мәйданнарда – алгы сызык!
Ромашкалар янә кызыл,
Йөзләрендә канлы тап…

Әгәр ярдәм көтеп арса,
Чыдамаса әгәр Муса,
Манарабыз әгәр ауса,
Без нишләрбез, татарлар?!
(1993)

Канлы төенчек

Әллә кызык өчен,
Әллә мәнсезлектән,
Ач этләрне ябып аранга,
Кимерелгән сөяк ташладылар:
«Сыйланыгыз, – диеп, – сарбайлар!»

Этләр, ырылдашып,
Дәррәү ташландылар
Сөяк төшеп баткан тузанга,
Теш-тырнаклар җигеп, котырынып,
Бүлештеләр табыш үзара.

Бөтерелде өер,
Йоннар очты,
Яралардан җиргә акты кан.
Ә кешеләр, кыргый ләззәт табып,
Күзәттеләр хәлне ерактан.

…Таралышты өер,
Юан бульдог
Өстен чыкты канлы бәйгедә.
Элек көчек булган бер төенчек
Ятып калды тәүге җәендә…
(2012)

Ринат Нуруллин БОГАУЛАНГАН ҺӘЙКӘЛ (шигырьләр) 
Оцените данную страницу

Расскажите в социальных сетях или обсудите в комментариях →
Share this Post

Покинуть Комментарий

Ваш e-mail не будет опубликован. Обязательные поля помечены *

Вы можете использовать это HTML метки и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>
*
*

*

code